[NEWS] [presentazione] [percorso] [bibliografia] [mostre] [galleria] [frottage] [mosaici&sculture] [hockeista] [teatro] [contatti]

 

Enzo E. Mari al è nassût a Triest tal 1939.
Insegnant emerit di Educazion Artistiche, tant che artist si è formât li dal Istitût Statâl di Art de sô citât, li che al à studiât daûr dai mestris Riccardo Bastianutto, Ugo Carà e Dino Predonzani, rivant a otignî il diplome di Maturitât Artistiche.
In graciis de sô inclinazion a lavorâ intun rapuart di solidarietât e di condivision di valôrs e di obietîfs, confermât ancje di une ativitât sportive fate tai nivei plui alts intun sport di scuadre, l’hockey su piste, Mari al è simpri rivât adore di tignî rapuarts produtîfs cun artiscj talians e forescj.
In cheste disposizion umane e professionâl si insuaze la sô adesion cussiente e salde a altris formazions, tant che il Gruppo & di Trieste, il Gruppo QUADRA, Formae Mentis e la Accademia UNA.
Un tant, di chê altre bande, nol à impedît al artist di puartâ simpri indevant une ativitât individuâl, sopontade di une inclinazion apassionade pe sperimentazion e pe ricercje, sedi par ce che al tocje i temis che la lenghe, e in cheste maniere al è stât bon di burî fûr une produzion artistiche di grande origjinalitât e sugjestion che il studiôs Sergio Molesi al comente cussì intun so studi critic: “Enzo E. Mari al è simpri stât interessât a olmâ tal stes timp la sostance e la aparence des robis, val a dî l’aspiet fenomenic e noumenic de realtât, che in tiermins artistics al ven a stâi l’aspiet plastic e cromatic de esperience visive.”
“Par metilu in vore, l’artist al à doprade la tecniche dal frottage pitoric. Cun chest mieç Enzo Mari al à tratât prime il teme de cjartate tant che lûc li che si intaie la olme de nature e dal artifi ci e po dopo il teme de piel li che si stampe il segn dal interiôr psichic e dal esteriôr dal spazi e dal timp storic. In cheste maniere la piel de muse si conforme tant che une sorte di sindone o di standart li che si pues lei il segn dai acjadiments personâi e storics.”
Enzo E. Mari al à vût part cun plui intervents te decorazion artistiche dal stadi Nereo Rocco di Triest, al à inmaneât mostris personâls e al à partecipât a rassegnis coletivis locâls, talianis e internazionâls fasint cognossi il so lavôr in Argjentine, in Austrie, in Gjermanie, in Portugal, in Russie, in Slovenie e tai Stâts Unîts di Americhe.
Al vîf e al lavore a Triest, puartant indevant la sô ativitât in studi, dutun cul “Gruppo &”, in via della Geppa, 4 e tal laboratori gnûf a Premariâs. (UD)